सामग्री खोज्नुहोस्

एजेन्सी । प्रस्तावित श्रीलङ्का–थाइल्याण्ड स्वतन्त्र व्यापार सम्झौता (एफटीए)मा पाँचौं चरणको वार्ता सुरु भएको छ । वार्ता सोमबारबाट कोलम्बोमा सुरु भएको हो ।

राष्ट्रपतिको मिडिया डिभिजन (पीएमडी)ले जनाएअनुसार आसियान देशहरूमा विशेष ध्यान केन्द्रित गर्दै प्रमुख र उदीयमान अर्थतन्त्रहरूसँग आर्थिक सम्बन्ध सुदृढ गर्ने श्रीलङ्काका राष्ट्रपति रनिल विक्रमासिङ्घेको दृष्टिकोणलाई ध्यानमा राख्दै पीएमडीले यो काम गरेको बताएको छ ।

अर्को चरणको वार्ता थाइल्याण्डमा अगस्ट २१ देखि २३ सम्म हुने तय गरिएको छ र फेब्रुअरी २०२४ सम्ममा सम्झौता सम्पन्न गर्ने गरी थप तीन चरणको कार्यक्रमको योजना बनाइएको छ ।

हस्ताक्षर मार्च २०२४ मा हुने अपेक्षा गरिएको छ । व्यापार सम्झौताको चौथो चरणको वार्ता यसैवर्ष मार्चमा भएको थियो ।

श्रीलङ्का दक्षिण एसियामा थाइल्याण्डको चौथो ठूलो व्यापारिक साझेदार हो ।

थाइल्याण्डमा श्रीलङ्काको मुख्य निर्यातमा रत्न, आभूषण, चिया, मसला, फाइबर र धातु उत्पादनहरू समावेश छन् ।

सन् २०२१ मा श्रीलङ्काले थाइल्याण्डबाट तीन सय ५५ मिलियन अमेरिकी डलरको सामानहरू आयात गरेको छ भने ५९ मिलियन डलरको वस्तुहरू थाइल्याण्डमा निर्यात गरेको छ ।