सामग्री खोज्नुहोस्

एजेन्सी । भारतीय प्रधानमन्त्री नरेन्द्र मोदी अमेरिका भ्रमणमा छन् ।

भ्रमणका क्रममा बिहीबार अमेरिकी राष्ट्रपति जो बाइडेनसँगको पत्रकार सम्मेलनमा प्रधानमन्त्री मोदीले भारतमा धार्मिक भेदभाव नरहेको दाबी गरेका छन् । अधिकार समूह र राज्य विभागको दुर्व्यवहारको रिपोर्टको बाबजुद पनि आफ्नो सरकारमा अल्पसंख्यकहरू विरुद्ध भेदभाव भएको कुरा उनले अस्वीकार गरेका रोयटर्सले लेखेको छ ।

पत्रकार सम्मेलनमा ‘तपाईंको देशमा मुस्लिम र अन्य अल्पसंख्यकहरूको अधिकार सुधार गर्न र वाक स्वतन्त्रता कायम राख्न के कदमहरू चाल्न इच्छुक हुनुहुन्छ’ भनेर सोध्दा मोदीले उनीहरूलाई सुधार्न आवश्यक नभएको प्रतिक्रिया दिएका थिए ।

ह्वाइट हाउसमा भएको वार्ताका क्रममा बाइडेनले मोदीसँग मानवअधिकार र अन्य लोकतान्त्रिक मूल्यमान्यताबारे छलफल गरेको थिए ।

यस्तै उनले बुधबार नेशनल साइन्स फाउन्डेशनमा ‘भविष्यका लागि सीप’ कार्यक्रमलाई सम्बोधन गर्दै भारत र अमेरिकाबीचको साझेदारीले दिगो र समावेशी विश्वव्यापी वृद्धिका निम्ति चालु इन्जिनको रूपमा काम गर्ने बताएका थिए ।

दुई देशबीचको बढ्दो गतिलाई कायम राख्न प्रतिभाको व्यवस्थापन र आदानप्रदानको आवश्यकतामा प्रधानमन्त्री मोदीले जोड दिएका थिए ।

सम्बोधनका क्रममा उनले विद्यार्थीको उज्ज्वल भविष्यका लागि भारतले गरेको विभिन्न कामको चर्चा गरेका थिए ।

साथै प्रधानमन्त्री मोदीले नयाँ शिक्षा नीति ल्याइएको र शिक्षा र सीपलाई एकीकृत गर्ने योजना बनाएको बताएका थिए । स्किल इन्डिया अन्तर्गत भारतले आर्टिफिसियल इन्टेलिजेन्स, ब्लकचेन, ड्रोनको क्षेत्रमा ‘१५ अर्ब मानिस’लाई दक्ष बनाएको उनको दाबी थियो ।

प्रधानमन्त्री मोदीले अमेरिकी विद्यार्थीलाई भारत आउनसमेत आग्रह गर्दै अमेरिकाका सयौँ शिक्षक पहिले देखिनै भारतमा रहेको र प्राविधिक साझेदारीमा भाग लिइरहेको बताएका थिए ।