सामग्री खोज्नुहोस्

एजेन्सी । भारतीय प्रधानमन्त्री नरेन्द्र मोदी आफ्नो पहिलो एवं ऐतिहासिक राजकीय भ्रमणका लागि अमेरिका पुगेका छन् ।

अमेरिका भ्रमणका क्रममा अमेरिका र भारतबीच थुप्रै रक्षा सम्झौता हुने छन् ।

अमेरिका प्रस्थान गर्नु अगाडि उनले आफ्नो ट्वीटरमा लेखेका थिए, ‘अमेरिका प्रस्थान गर्दैछु, जहाँ म न्यूयोर्क शहर र वाशिङ्गटन डीसीमा हुने कार्यक्रमहरूमा सहभागी हुनेछु । ती कार्यक्रमहरूमा योग दिवस मनाउने, राष्ट्रपति बाइडेनसँग वार्ता गर्ने लगायातका कार्यक्रम छन् ।’

प्रधानमन्त्री मोदीलाई अमेरिकी राष्ट्रपति जो बाइडेन र प्रथम महिला जिल बाइडेनले अमेरिका भ्रमणको निम्तो दिएका थिए ।

उनको भ्रमण न्यूयोर्कमा शुरु भएको छ । जहाँ प्रधानमन्त्री मोदीले बुधबार बिहान संयुक्त राष्ट्रसंघ मुख्यालयमा अन्तर्राष्ट्रिय योग दिवस मनाउने कार्यक्रम छ ।

त्यसपछि प्रधानमन्त्री मोदी वाशिङ्गटन डीसी प्रस्थान गर्नेछन् । वाशिङ्गटनमा उनले जुन २२ मा ह्वाइट हाउसमा राष्ट्रपति बाइडेनलाई भेट्ने छन् । राष्ट्रपति बाइडेन र प्रथम महिला जिल बाइडेनले सोही दिन साँझ प्रधानमन्त्री मोदीको सम्मानका लागि रात्रि भोजको आयोजना गर्नेछन् ।

प्रधानमन्त्री मोदीले जुन २२ मा अमेरिकी कंग्रेसको संयुक्त बैठकलाई पनि सम्बोधन गर्ने कार्यक्रम तय भएको छ ।

प्रधानमन्त्री मोदी २४ जुनसम्म अमेरिकामा रहने छन् ।