सामग्री खोज्नुहोस्

टोकियो । टोकियो स्थित नेपाली दुतावासले जापानमा रहेका सम्पूर्ण नेपालीहरुको अभिलेख राख्न सुरु गरेको छ । गणतन्त्र दिवसका अबसरमा दुतावासले आयोजना गरेको एक कार्यक्रममा जापानका लागि नेपाली राजदुत डा. दुर्गाबहादुर सुबेदीले जापानमा रहेका सबै नेपालीहरुको अभिलेख राख्ने घोषणा गरे लगत्तै दुतावासले बिज्ञप्ति मार्फत अभिलेखीकरण सुरु भएको जनाएको हो ।

राजदुत सुबेदीले घोषणा गरेको भोलिपल्ट मंगलबार दुतावासले बिज्ञप्ति जारी गर्दै जापानमा रहेका नेपालीहरुको अभिलेखीकरण गर्ने कार्यक्रम सुरु भएकाले सबैलाई सहयोग गर्न आग्रह गरिएको छ ।

‘राजदूतावासमा रहने उक्त अभिलेखमा आफ्नो विवरण दर्ता गर्नुहुन समस्त जापानवासी दाजुभाइ तथा दिदीबहिनीहरुलाइ राजदुतावास हार्दिक अनुरोध गर्दछ।’ दुतावासद्वारा मंगलबार जारी बिज्ञप्तिमा भनिएको छ। दुतावासले गैर आवासीय नेपाली संघ जापान लगायत जापानमा क्रियासिल संघ सस्थाहरुको सहयोगमा नेपालीहरुको अभिलेख तयार पार्न लागेको बिज्ञप्तिमा उल्लेख गरेको छ।

डिजिटल अभिलेखीकरणका लागि दुतावासको वेब साइडमा यथाशीघ्र सिस्टमको डेब्लप गरिने पनि बिज्ञप्तिमा उल्लेख गरिएको छ । तर, अभिलेखीकरणका लागि के कस्ता कागजपत्रको आबश्यक पर्ने हो बिज्ञप्तिमा उल्लेख गरिएको छैन ।

जापानमा रहेका कतिपय नेपालीहरुले यहीको राहदानी लिएका छन् । राहदानी लिएका तर दूतावासमा जानकारी नगराएका नेपालीहरुको अभिलेख कसरी राख्ने भन्ने बिषयमा दुतावासको बिज्ञप्ति मौन छ ।

जापानको राहदानी प्राप्त गरेको तर नेपाली दुतावासलाई जानकारी नगराएको खण्डमा नेपालको नागरिकता र पासपोर्ट पनि रद्द हुँदैन । यसको मतलब जापानको राहदानी लिएको जानकारी दुतावासलाई नगराएका व्यक्तिहरुले दोहोरो पासपोर्ट बोक्ने सम्भावना बढी हुन्छ। जुन, नेपाल र जापान दुवै देशको कानूनले बर्जित गरेको छ ।

यसैबीच दुतावासको फोन नउठेको भनी ब्यापक गुनासो बढेपछि दुतावासले हटलाइन नम्बरको ब्यबस्ता गरेको छ । दुतावासले आज एक बिज्ञप्ति मार्फत हटलाइन नम्बरको ब्यबस्ता गरेको जानकारी दिएको हो । दुतावासका अनुसार अब नेपालीहरुले ०३-३७१३-६२४१ नम्बरमा टेलिफोन गरेर आबस्यक जानकारी लिन सक्नेछन ।