सामग्री खोज्नुहोस्

काठमाडौं । वर्षाका कारण पहिलो इनिङ्गमै रोकिएको नेपाल र युएइबीचको बाँकी खेल मंगलवार हुने भएको छ । एसीसी प्रिमियर कप अन्तर्गत टियु क्रिकेट खेल मैदानमा भैरहेको नेपाल र यूएईबीचको फाइनल खेल वर्षाका कारण २७.३ ओभरमा रोकिएको थियो ।

भोलिका लागी सरेको खेल आजकै अवस्था बाट सुरु हुने नेपाल क्रिकेट संघले जनाएको छ । खेल रोकिंदा युएइ २७.३ खेल्दै ९ विकेटको क्षेतिमा १०६ रन जोड्न सफल भएको छ । नेपालका लागि ललित राजवंशीले २७ ओभरको तेश्रो बल फालेपछि खेल स्थगित भएकाले भोलि बिहान २७ ओभरको चौथो बल ललितलेनै गर्नेछन।

टस जितेर पहिला फिल्डिङ रोजेको नेपालले बलिङमा युएइ माथि सुरु देखिनै दवाबमा राखेको थियो । नेपालका लागि ललित राजवंशीले लगातार २ विकेट लिएर ह्याट्रिकको प्रतिक्षा गरिरहेका छन् । भोलि हुने फाइनल खेल आजकै निरन्तरता भएकाले पहिलो बलमै विकेट झार्न सके ललितको ह्याट्रिक हुनेछ । आजको खेलमा ललितले युएइका आसिफ खान र जाहुर खानको विकेट लिएका हुन् ।

यसअघि सन्दीप लामिछानेले आयन अफ्जल खानलाई कुशल मल्ल मार्फत क्याच गराएका थिए । नेपालका लागि करण केसीले २, ललित राजवंशीले ३, सन्दिप लामिछानेले २ विकेट लिए भने गुल्सन झा र सोमपाल कामीले १/१ विकेट लिएको अबस्थामा आजको खेल स्थगित भएको छ । बर्षाले खेल रोकिएपनि दर्शकहरुले अन्त्य सम्म खेल सुचारु हुने आशामा प्रतिक्षा गरिरहेका थिए । दर्शकहरुले नेपाली क्रिकेटप्रति अबिश्वनिया माया देखाएको भन्दै क्यानले दर्शकहरुलाई धन्यवाद समेत व्यक्त गरेको थियो।

भोलि पनि मौसम खराबी रहे र खेल हुन नसके आईसीसी वरीयताका आधारमा नेपाल विजयी हुनेछ । त्यसअघि सम्भव भएसम्म सुपर ओभरबाट नतिजा निकाल्ने प्रयास गरिनेछ ।