सामग्री खोज्नुहोस्

टोकियो । जापानको सेन्दाई स्थित खाइक्यु जापानीज भाषा बिद्यालयको ब्यबस्थापन पक्षले नेपालको मिराकल्स कन्सल्टेन्सीलाइ कमिसन दिन बाँकी रहेकाले ९ जना बिद्यार्थीको फी नतिरेको कन्सल्टेन्सीको आरोपलाई खण्डन गरेको छ।

उक्त बिद्यालयमा अध्ययनका लागि जापान आएका बिद्यार्थीको स्कूल फी ड्यू रहेको भन्दै बिद्यार्थीलाइ निष्कासन गर्ने प्रक्रिया थालिएको बिषयमा क्योदाई न्यूज संग कुरा गर्दै कन्सल्टेन्सीका संचालक सुमन सिङ गोतामे क्षेत्रीले विद्यालयले आफुले पाउने कमिसन नदिएका कारण स्कूल फी नपठाएको बताएका थिए ।

‘हामीले उक्त कसल्टेन्सिलाइ कमिसन नदिएर फी रोकिएको भन्ने कुरा गलत हो’ बिद्यालयका मनि खड्काले भने ‘नियमानुसार पाउन पर्ने कमिसन रोकिएको छैन, प्रक्रियामा रहेको बढीमा ५ लाख रोकिएको चाही हो ।’

त्यस्तै केही बिद्यार्थीहरुको ओरिजिनल डकुमेन्ट बिद्यालयमै रोकिएको बिषयमा सोमबार सबै डकुमेन्ट नेपाल पठाउने बिद्यालयले जनाएको छ । ‘कन्सल्टेन्सीले बदमासी गरेपछि ८ जना बिद्यार्थीहरुको ओरिजिनल डकुमेन्ट हामी संगै छ’ खड्काले भने ‘डकुमेन्ट पठाउन हामीलाई समस्या छैन, सोमबार पठाउछौ ।’

अध्ययनका लागि जापान आउने बिद्यार्थीहरु शैक्षिक प्रमाणपत्रको ओरिजिनल अध्यागमनमा पेस गर्न पर्ने जापनको नियम छ । कन्सल्टेन्सीले अध्यनका लागि आएका ९ जना बिद्यार्थीको फी नतिरेका कारण बिद्यार्थी तनावमा परेको समाचार क्योदाई न्यूजले हिजो प्रकाशन गरेको थियो ।

यस्तै नेपाल स्थित मिराकल्स कन्सल्टेन्सीले भने बिद्यार्थीहरुको फी रोकिएको बिद्यालय र आफूहरुको आन्तरिक कारण भएकाले बिद्यालय संग कुराकानी गरेर टुंगो लगाउने बताएको छ । ‘हामी उहाहरु संग आज कुरा गरेर यो समस्याको समाधान खोज्छौ’ कन्सल्टेन्सीका संचालक सुमन सिङ गोतामे क्षेत्रीले भने ‘बिद्यार्थीहरुलाई हामीले समस्यामा पर्दैनौ र पार्नुपनि हुँदैन तर हाम्रा कुराहरु पनि विद्यालयले मिलाइदिनु पर्छ ।’

उनले आगामी सोमबार सम्म समस्या समाधान हुने ठोस नतिजा निकाल्ने प्रतिबद्दता समेत जनाएका छन् । आफुहरुले बिद्यार्थीका अविभावकहरु संग पनि नियमित कुराकानी गरिरहेको बताएका छन् ।